Salut, Sarragos!

Salut, Sarragos !…
(air : « les Baladins » de Gilbert Bécaud)

Ce portrait est dédié à M. Maurice Duhaubois qui, avec les Amis de Tournai, a « ressuscité » Sarragos.

1. Ein matin gris, à l’Assistanc’ publique,
A l’Hôpital, ch’est là qu’on t’a trouvé !
Comm’miséreux, t’étéos l’merci-pratique :
T’aveos deux meos, t’éteos abandonné…
Et te brayeos seur’mint, mansé dins t’cottin d’toile
Et tes vieill’s noirtes loqu’s qui f’seottent t’cul tout nu !
Sur’mint, te n’éteos pos né sous ein’ beonne étoile,
Et t’mopèr’, certain’mint, cha n’éteot pos du ch’nu !
Tout l’meonte i-a oblié l’neom qu’on t’aveot queusi
Puisque ch’t’ein sobriquet qui t’as mis dins l’histoire…
Des infants malhureux, t’as fait ein’ pach’ de gloire :
Tout l’meonte i-a oblié qu’on t’app’leot Alexis !
Te d’viendras, paufe infant trouvé,
Ein personnache, ein perseonnache…
Te d’viendras, paufe infant trouvé,
No Sarragos, infant d’Tournai !

2. Bin pus d’ein queop, t’as dû canger d’nourrice,
Avant d’dev’nir l’esclaf’ des p’tits gamins…
Ein capieau claque, ein tablier d’toil’ grisse,
Ein’ grant’ capot’, ch’éteot là t’n’habill’mint :
Ch’éteot l’accoutremint ed’tous les collets rouches,
Pour qu’on sait bin ainsin qu’cha n’éteot qu’des pourvus !
Du cachet de l’misère, on t’a marqué à l’louche,
Et dev’nir comme ein éaut’, te n’areos pos pouvu !
T’as berdélé pou t’queompte après des aclopins
Qui t’eont fait pus d’ein’ nich’, pour que te t’fout’s in rache…
Te queurreos après euss sur tes bottin’s à daches…
T’aveos b’souin, pou t’ormett’, d’aller boire ein verquin !
T’es dev’nu, dins l’z’estaminets,
Ein personnache, ein personnache…
T’es dev’nu, dins l’z’estaminets,
No Sarragos, pauf’ de Tournai !

3. Mais aujord’hui, au mitan de l’Grand-Plache,
T’es t’à l’honneur, t’ov’là avec les Grands…
L’solel i uit… musique… ormue-ménache…
Tournai in fiête, in t’n’honneur, bat ein ban !
Fini l’temps qu’on crieot : « Aïou !Aïou ! Coul’douche ! »
Asteur, t’ov’là l’prumier après no Rein’Tournay !
Binhureux de t’moutrer pas d’vant les Collets rouches,
Te viens faire ein pas d’dans, pa d’vant l’z’autorités !
Ch’est acor là qu’t’es l’mieux, puteot qu’dins ein musée…
Quand des airs tournaisiens, el’foule ell’se pourlèche,
Tout l’meonte i-est bin d’accord, au soir des quat’cortèches,
El plach’ de Sarragos, ch’est dins les rues d’Tournai !
Te rest’ras, pour l’éternité,
Ein personnache, ains personnache…
Te rest’ras, pou l’éternité,
L’grand Sarragos, géant d’Tournai !

Pol Guilbert
Concours Prayez 1977
Premier prix : Prix Georges Delcourt